Tidlegare har Idrettslaget sine representantar gått inn for området ved Grendahuset, men no går dei også inn for Bjørkheim.

- Slik eg ser det, er Bjørkheim det einaste alternativet som er mogeleg å få realisert. Og skal me få ein hall i Samnanger er det no eller aldri. Steinmassane er ein gåvepakke til prosjektet, seier Nils Aadland, som saman med Roger Lemme har representert Idrettslaget i hallnemnda.

Nils Aadland legg mellom anna vekt på at både fylkeskommunen og miljøavdelinga hos Fylkesmannen er svært positive til å plassera hallen i Vågen ved Bjørkheim. Dei ser føre seg at området kan gjerast både finare og meir tilgjengeleg enn det er i dag, at det kan verta eit flott område for bading, fisking og friluftsliv.

Og det er slett ikkje noko lite området, dette, påpeikar Nils Aadland. I framtida vil det eventuelt vera plass til både symjehall og for den saks skuld kunstgrasbane på området, i tillegg til fleirbrukshall og parkeringsplass. Det vil og verta eit grønt og fint område, på to nivå og med buskar og tre.

Å sjå nærmare på Lauskar og Haukaneset har han ikkje noko tru på. – Nemnda har jo alt vurdert desse stadane. Desse alternativa vil verta langt dyrare. For her vil ein få store kostnader med veg som anten må byggjast eller utbetrast, vatn og kloakk. Dessutan er vegvesenet negative her, anten det er snakk om nytt kryss eller utvida bruk av eksisterande kryss. Hagabotnane er også heilt urealistisk, påpeikar Nils Aadland, sidan tilskotsordningane gjer at det ikkje er mogeleg å få til ein rein idrettshall, som det måtte ha vorte der. Nils Aadland fortel elles at veldig mange har kontakta han og gjeve uttrykk for at ein hall er noko Samnanger verkeleg treng.

- Men det er no eller aldri, trur eg. Samnanger har ingen rik onkel, seier Nils Aadland.

Når Reistadvika er mindre aktuell enn før har det mellom anna med flaum å gjera. Leiar for teknisk eining, Ivar Erstad, seier at det nok vil vera mogeleg å løysa dei problema, for eksempel ved å byggja hallen på eit litt høgare nivå enn vegen og eventuelt parkeringsplassen attmed hallen. Men problema rundt elva og flaum vil uansett føra til auka kostnad, seier Ivar Erstad. Nemnda peikar også på at tomta er i minste laget for å få til nødvendige trafikkløysingar i tillegg til hall og parkering. I tillegg vil miljø- og verneinteresser koma inn i biletet her.

Samningen har også snakka med rådmann Tone Ramsli og lufta alternativet med å behalda ungdomsskulen på Tysse og byggja hallen ved skulen der.

- Det er ikkje mogeleg å byggja noko hall ved ungdomsskulen på Tysse, slær rådmannen fast. - Det er rett og slett ikkje plass, langt der i frå. For sjølv om det vil vera plass til sjølve hallen, som treng om lag to mål, så treng ein eit like stort område til parkering. Og kvar skal så elevane gjera av seg? Dei treng den plassen som er der i dag, seier rådmann Tone Ramsli. Tilskotsordningane talar heller ikkje for ein hall her, forstår me.

Problemet med å gjera Nordbygda skule om til ungdomsskule, der ein eventuell hall i Vågen ved Bjørkheim skal fungera som gymnastikksal for skulen, er mellom anna avstanden mellom skulen og hallen.

Rådmannen har følgjande å seia om den problemstillinga:

- Her må ein skilja mellom fysisk aktivitet og faget kroppsøving. På ungdomsskulen har elevane berre to timar kroppsøving i veka. Desse to timane kan ein ha i blokk, altså samla på ein dag. Om ein då legg dei timane først eller sist på dagen, kan elevane gå på eller av bussen på Bjørkheim. Dermed vert det berre eine vegen ein må gå. Dei skal også ha 10 minuttar friminutt for kvar time, altså 20 minuttar for begge timane. Dei 20 minuttane har dei då til å gå til eller frå skulen når dei har kroppsøving. Dette er vurdert til å vera ei bra ordning, reint pedagogisk, seier Tone Ramsli.

Når det gjeld økonomien går hallnemnda ut frå ein kvm-pris på 18.000 for hallen. Hallen er tenkt å verta litt over 2200 kvm stor og vil dermed kosta om lag 40 millionar kroner. Reknar ein så med om lag 8 millionar i spelemidlar, 10 millionar i momskompensasjon, 0,5 millionar frå Enova og 3 millionar frå fylket, må kommunen skaffa om lag 19 millionar på annan måte.

Men dette er kostnaden med sjølve hallen. Skal den kombinerast med noko, og det skal den altså, kjem kostnaden med det i tillegg. Skal det for eksempel byggjast bibliotek er det rekna med ein ekstra kostnad på 6 millionar, om ein reknar eit bibliotek på 200 kvm.

Etter at eit konsulentfirma slo fast at ei utvendig vøla av kommunehuset på Tysse vil kosta mellom 12 og 15 millionar kroner (!), har det også det å byggja nytt kommunehus som ein del av ein fleirbrukshall vore framme. Kostnaden her vil vera om lag 18 millionar for eit kommunehus på 600 kvm. Då har ein tenkt seg at kommunehuset skal dela kantine, møterom m.m. med dei andre som held til i hallen.

For dei som lurer på kor tid ein slik hall eventuell vil koma, går dei første par åra med til planarbeid og til å venta på stein. Bakk har antyda at steinmassar kan vera tilgjengeleg frå 2012. Då vil hallen kunna byggjast i 2013/2014.