Eit samla kommunestyre gav sist torsdag ordføraren og eit eige kraftutval vide fullmakter til å fremja Samnanger kommune sine interesser i møte med styresmaktene og dei ulike aktørane i linjesaka. Å få ny småkraft på nett, samt få ny vurdering av sideelevane til Eikedalsvassdraget er det viktigaste kommunen ønskjer å oppnå.

Tysdag var olje- og energiminister Terje Riis-Johansen i Bergen og gjorde det klart at det vert luftspenn over Kvamskogen, og det vert anleggsstart i Samnanger no i haust. Alt i morgon har Samnanger sitt kraftutval møte med Statnett om linja.

I papirutgåva kan du lesa meir om linje-møtet sist torsdag.

Bengt Drageset

Det er med ei viss undring grunneigarane langs Eikedalselva observerer det som skjer omkring bygginga av ei 420 kv-linje frå Sima til Børdalen i Samnanger. Som grunneigarar i eit område der kraftutbygginga starta for over 100 år sidan, er dei godt vane med kraftlinjer og alt anna som høyrer vasskraftproduksjon til. Det finn dei seg i, trass i at det meste av utbygginga vart gjort for så lenge sidan at dei som grunneigarar ikkje tener noko som helst på det.

No kjem ei ny linje gjennom delar av området, ei linje som vert alt anna enn usynleg, men som NVE har sagt ja til. Men når grunneigarane vil byggja ut kraft i området, ei utbygging som vert usynleg frå Eikedalselva, så får dei altså nei. For Eikedalselva og sideelvane er verna.

Då Eikedalsvassdraget vart varig verna for 25 år sidan var det først og fremst på grunn av Fossen Bratte og Mørkhølsfossen. Men samstundes vart også sideelvane og nedbørsfeltet til Eikedalsvatnet verna.

Verninga har likevel ikkje ført til mindre aktivitet i området, snarare tvert om. Grunneigar Johannes Kulild viser til at sidan den gong er for eksempel vegen langs elva utvida, med fyllingar og murar heilt ned i elva. Det er bygt tallause hytter i nedbørsfeltet til Eikedalsvatnet. Også Eikedalen skisenter er bygt sidan den gong. Ny linjer er det også bygt, for ikkje å snakka om trafostasjonen i Børdalen. Også den nye Sima – Samnanger-linja vil gå rett gjennom kjerneområdet for det verna vassdraget og vil verta svært godt synleg frå for eksempel Fossen Bratte.

Det er på denne bakgrunnen Johannes Kulild og dei andre grunneigarane undrar seg over å få nei til sine planar. For grunneigarane har ikkje tenkt å røra korkje Fossen Bratte eller Mørkhølsfossen. Det er sideelvane Jarlandselva, Kvannevikselva og Børdalselva dei vil ha utbygging i.

Folk som måtte kjøra eller gå langs Eikedalselva vil ikkje sjå eit einaste spor etter grunneigarane si utbygging, om den vart gjennomført. Dei som går til fjells og oppsøkjer naturen til fots vil i praksis heller ikkje sjå stort til utbygginga, fortel Johannes Kulild.

Det er Kvannevikselva som utgjer den absolutt største delen av planane. Her kan det produserast 95 GWh årleg, noko som for eksempel er meir kraft enn det BKK vil auka sin produksjon med om dei får lov å gjennomføra sine planar om ny kraftstasjon i Aldalen. Kvannevikselva er tenkt bygt ut ved å laga tunell heilt oppe frå Kvannevika og ned til ein stasjon inne i fjellet på Jarland. Dei synlege spora vil dermed verta oppe i Kvannevika, men det er i eit område nesten ingen fjellgåar besøkjer, i alle fall ikkje frivillig, sidan ein uansett må tilbake til Holmane eller Rossebotn for å koma seg ned att på skapeleg vis. I tillegg til Kvannevikselva vil ein her også ta vatn frå Stutabottselva og overføra til Kvannevika. Men denne overføringa vil ha minimalt å seia for vassføringa i elva frå Storlia og ned til Frøland, fortel Johannes Kulild og viser til målingar som er gjort på akkurat det.

Når det gjeld Jarlandselva er det i hovudsak snakk om å byggja ut elva nedom Holmane, altså eit område dei aller fleste kjører bil gjennom. I den tette skogen ser ein ikkje stort til elva uansett. Ved ei full utbygging her vil det i tillegg vera snakk om å overføra vatn frå Kikedalen. Då kan det maksimalt produserast 37 GWh i Jarlandselva. Akkurat når det gjeld sjølve Jarlandselva har grunneigarane inne ein eigen konsesjonssøknad om eit lite småkraftverk som vil ha ein årsproduksjon på om lag 7 gwh. Ei slik utbygging vil vera innanfor rammene for verna vassdrag, men vil trass alt berre få ut 5 % av potensialet for sideelevane.

Bengt Drageset ønskjer å byggja eit småkraftverk nede i sjølve Børdalen, eit kraftverk som skal forsyna garden, inkludert ei høytørke, med straum. I framtida ser han føre seg at det også kan verta aktuelt å bruka eigenprodusert kraft til for eksempel flisproduksjon. Resten av krafta vil han selja.

Alt skulle liggja til rette for ei slik utbygging i Børdalen. Ikkje må det byggjast veg, for den er der alt. Ikkje er det snakk om å demma opp og laga andre skjemmande sår i naturen heller. Naturinngrepa vert minimale. Men nei, Børdalselva er sideelv til Eikedalselva, så dermed har Bengt Drageset fått avslag på konsesjonssøknaden sin.

Han legg ikkje skjul på at det verkar rart. Børdalen er til dei grader prega av kraftutbygging, ein ser mastrer kvar ein snur seg. Når du kjører opp til Børdalen vert du møtt av ein stor trafostasjon.

- Eg protesterte den gong trafostasjonen skulle byggjast, vel vitande om at det lett kunne verta meir når eit slikt knutepunkt først er etablert. Det vert det altså no, og me ser neppe slutten på det denne gongen heller, seier Bengt.

Bengt Drageset er også ein av svært få gardbrukarar i Samnanger som driv aktivt skogbruk. Kombinasjonen skogbruk og stadig nye linjer er dårleg. I dei bratte liene i Børdalen er banedrift einaste måten å få skogen ut på. Men banedrift er forbode under høgspentlinjene. Dermed bandlegg linjene store areal på bruket.

- Men slik er det. Storsamfunnet tek seg til rette, medan det er svært avgrensa kva grunneigaren får lov å gjera på sin eigen grunn, slår Bengt Drageset fast.

Grunneigarane stiller også spørsmål ved det som skjedde då Eikedalselva vart varig verna for 25 år sidan. Etter det grunneigarane har funne ut, skjedde det utan at korkje grunneigarane eller kommunen har uttalt seg, av ein eller annan uforståeleg grunn, sjølv om både elva og det aller meste av nedbørsfeltet ligg i Samnanger.

Johannes Kulild håpar no at kommunen vil ta opp vernevedtaket med regjering og Storting for å få gjort noko med denne saka. Eit alternativ kan vera at sideelvane vert tekne ut av vernevedtektene, eit anna kan vera å for eksempel berre verna Fossen Bratte, slik Johannes Kulild ser det.

Uansett har han vanskeleg for å tru at styresmaktene verkeleg kan seia nei til eit så samfunnsmessig og miljømessig godt prosjekt. Betydelege mengder med kraft er det også snakk om. Til saman snakkar me om 140 GWh, nok til å forsyna 7.000 husstandar.

For kommunen vil ei slik utbygging også gje årlege inntekter på 8 – 9 millionar kroner, nok til å finansiera både fleirbrukshall, sjukeheim og meir til.

Heile utbygginga vil kosta ein stad rundt 300 millionar kroner, noko som gjer at det først og fremst vert neste generasjon grunneigarar som får glede av ei eventuell utbygging. Men med kraftinntekter vil det straks vera meir interessant både å overta og å driva bruka i området, påpeikar Johannes Kulild. Ei full utbygging vil omfatta bruka på Frøland, Jarland, Haug, Holmane, Børdalen og Storlia.

- Eg har lyst til å prøva å gjera laurdagen til ein litt annleis dag på biblioteket, seier biblioteksjef Astrid Holmefjord som har planar om fire laurdagar med ope bibliotek dei komande månadene.

Kanskje vert det ei lita eventyrstund i løpet av dagen, kanskje vert det høve til å få seg ein kaffikopp i ro og fred medan ein blar i ei bok eller eit tidsskrift. Den som kjem innom, får sjå.

Det som i alle fall er sikkert er at biblioteket skal vera ope på dagtid om lag kvar femte laurdag utover hausten.

- Me ønskjer å ha ope når folk har fri, seier Astrid.

Ho fortel at mange seier at dei synes det er vanskeleg å rekka innom biblioteket for å låna eller levera fordi det som oftast er stengt når dei er ferdige på jobben. Så langt har biblioteket vore ope to kveldar i veka, i tillegg til å ha ope på dagtid, men frå og med denne hausten vert det berre ein kveld. Astrid fortel at ho ikkje maktar å halda ope to ettermiddagar og kveldar no når ikkje Dagfrid Våge har ei lita stilling på biblioteket lenger. Å halda ope nokre laurdagar i staden, vil forhåpentlegvis kunne vega opp for færre kveldar. Og kanskje få fleire folk innom biblioteket.

Ser ein på statistikk som viser tal på bibliotekbesøk per innbyggjar, ligg Samnanger kommune dårleg an, fortel Astrid. Det har naturleg nok samanheng med tilgjengelegheit og opningstid. Bibliotek som ligg sentralt, og har høve til å halda ope på tidar som er gunstige for folk flest, visar seg gjerne å vera godt besøkte. Sentralt plasserte bibliotek får også gjerne ein funksjon utover det å låna ut bøker og anna. Mange kjem innom berre for å setja seg ned og bla igjennom dagens avis, og mange fordi dei veit at dei som oftast vil treffa kjentfolk dei kan slå av ein prat med på biblioteket, fortel Astrid. Dermed vert biblioteket også ein sosial møteplass.

Om laurdagen viser seg å verta ein populær bibliotekdag i Samnanger, vil ein vurdera om ein skal halda fram med laurdagsope også på nyåret, seier biblioteksjefen.

Eit anna grep for å gjera folkebiblioteket på Tysse betre for lånarane, er at det no har kome på plass ei datamaskin der lånarane sjølv kan registrera bøker inn og ut. Foreløpig skal dette sjølvbeteningssystemet berre brukast i biblioteket si opningstid. Poenget er at folk skal sleppa å stå i kø når dei berre skal levera eller låna bøker, filmar og anna, forklarer Astrid. Ved hjelp av lånekortet kan kvar einskild lånar logga seg på sjølvbeteningsmaskina. Og vel inne i eiga ”mappe”, er det berre å registrera strekkoden på det ein vil låna eller levera. Enkelt og greitt.

Men akkurat dette med lånekortet kan kanskje verta ei lita utfordring, smiler Astrid. Her i Samnanger er det nemleg tradisjon for å ikkje bruka lånekortet på biblioteket. Biblioteksjefen leitar like greitt opp lånarar ved hjelp av etternamn som lånekort. Men sjølvbeteningsmaskina gjer ikkje det. Så om du no ser føre deg at heile sjølvbeteningsopplegget går føyken fordi du har rota vekk lånekortet ditt, kan me opplysa om at du sjølvsagt kan få eit nytt kort på biblioteket. Viss du ikkje allereie har eit såkalla Nasjonalt lånekort, då, som til dømes Bergen offentlege bibliotek bruker i dag. Det kan registrerast og nyttast i på biblioteket her i Samnanger også.

Astrid fortel at nokon bibliotek har periodar der biblioteket er heilt sjølvbetjent, det vil seia at du kan låna bøker på eiga hand også når biblioteket er stengt. Men om Samnanger etter kvart vil få ei slik ordning, er uvisst.

Biblioteket på Tysse ønskjer seg elles ei eiga datamaskin der lånarane sjølv kan søkja etter kva bøker som finst i hyllene, seier Astrid, og fortel at publikumsmaskinene på biblioteket som oftast er opptekne. Men å få plass til enno ei datamaskin i eit biblioteklokale der kvar einaste krok og krik, og vel så det, allereie er teken i bruk, vert nok ei utfordring.

Facebook har folkebiblioteket i Samnanger vore på ei stund, og ein god liten venegjeng har det fått.

- Facebook er ein veldig effektiv måte å informera om små og store ting, og det er ofte der eg legg ut informasjon først, seier Astrid.

I tillegg til at lånarane får fersk informasjon via Facebook, er det òg ein god kanal for å få tilbakemeldingar, meiner Astrid. I desse dagar vurderer ho mellom anna kva for tidsskrift biblioteket skal ha. Nokre av tidsskrifta som er å finna på hyllene i dag, viser seg å vera lite utlånt, så kanskje er det heilt andre tidsskrift folk vil ha? Ei lita melding til lånarane via Facebook er ein uformell, kjapp og grei måte å lufta slike ting på, synest biblioteksjefen, som altså er glad for tilbakemeldingar både når det gjeld innkjøp av tidsskrift og anna som har med biblioteket å gjera.

La oss starta med mannen som song og spela piano. Han heiter Stig Eldred og har ein lang karriere bak seg både som musikar og skodespelar.

Stig Eldred er fødd i Skandinavia, oppvaksen i Los Angeles og budde fleire år Canada før han for mange år sidan fekk eit tre månaders oppdrag på New Zealand. Det oppdraget tek visst aldri slutt.

Stig Eldred har spelt saman med kjente artistar som Buddy Miles. Han har spela i Joe Cocker sin gebursdag. I tillegg har han hatt ei endelaus rekke av opptredenar verda rundt på eiga hand. Men han er også skodespelar og har medverka i ei rekke filmar, mellom anna i Peter Jacksons ”King Kong” og i ”Dick Tracy”.

På New Zealand er Stig Eldred også kjent som Julenissen med stor J. Kvar jul får om lag 200.000 menneske med seg førestillinga hans.

No har det seg slik at Stig Eldred har ein god del slekt her i landet. Ein av dei er Aage Takvam i Rolvsvåg. Då Stig var på besøk hos Aage tidlegare i sumar fekk han også vera med i 40-årslag i Trengereidfjorden. Der spela nokre av toradarjentene våre. Stig Eldred let seg begeistra av både den spesielle lyden og musikken. Dette var jenter han kunne tenkja seg å spela med.

Slik har det seg at når Stig Eldred førstkomande sundag skal ha konsert i Logen i Bergen, så vert toraderjentene Silje-Marie Tveit Hansen, Gunn Østvik Petersen og Mona Boge med på laget.

Stig Eldred skal spela trekkspel saman med jentene. Mellom anna vil dei framføra Silje-Marie sin vals ”Dagen der på”. Men Stig Eldred skal også framføra musikk med piano, song og toradar, ein heilt uvanleg kombinasjon, mildt sagt. Han og Silje-Marie har hatt sine utfordringar med å få toradaren, eit instrument Stig Eldred likar lyden av, men også omtalar som rart og vanskeleg, til å gå saman med pianoet hans. Resultatet er likevel forbløffande vakkert og åleine verdt ein bytur sundagskvelden. Samningen var altså så heldig å få høyra Stig Eldred og Silje-Marie Tveit Hansen framføra ”Candel in the wind”, der den normalt lystige toradaren var sår og mjuk og heilt annleis. Resultatet kunne få ein gråstein til å gråta.

- Men så er då også Silje-Marie i ein klasse for seg som toradarspelar, understrekar venninnene Gunn og Mona.

Stig Eldred er også imponert og trur det vil verta ein flott konsert på sundag kveld. – Det er berre å møta opp i Logen. Billettane kostar ikkje meir enn hundre kroner, dørene opnar klokka åtte og konserten begynnar klokka ni, får han sagt – før me rekk å fortelja at me ikkje driv med reklame i redaksjonelt stoff i Samningen.

Det var nok ikkje berre førsteklassingane som hadde sumarfulglar i magen då dei møtte opp på skulen i dag. Me såg mange spente fjes både blant små og store elevar, og blant dei tilsette, då me var ein snartur oppom Samnanger barneskule rett før det ringte inn til første time denne onsdagsmorgonen.

Samnanger barneskule skal altså husa alle barneskuleelevane i Samnanger frå og med denne hausten. Innvendig er skulelokala så godt som klare no, men det gjenstår framleis litt arbeid på skulens uteområde.

Etter fleire tiår med prat og planar, skjer det endeleg noko. Ytre Tysse skal rustast opp og gjerast finare. Neste sumar skal første og største etappe i arbeidet vera fullført. Resten må venta til tunellen bak Tysse er på plass.

Utgangspunktet for arbeidet på Ytre Tysse er at kommunen måtte gjera noko med vass- og kloakkanlegget. Kloakken går i dag rett i sjøen. Vassforsyninga er også dårleg for mange i området. Noko måtte gjerast. Og når ein først skulle til med omfattande arbeid mellom husa på Ytre Tysse, ville kommunen også nytta sjansen til å rusta opp heile Samnangers ”sørlandsidyll”.

Utanfor Sparbutikken skal det altså koma ny kai. 18 pilarar vert dunka 12 meter ned i grunnen. Når kaien er ferdig vil det verta ei rekkje med parkeringsplassar, som før. Men utanfor parkeringsområdet skal det verta benkar og samlingsplass for fastbuande og gjester, anten dei kjem sjøvegen eller landevegen.

Meir om Ytre Tysse i papirutgåva.

- Eg har lenge har hatt lyst til å jobba med ungar og kunna hjelpa dei og familiene deira i vanskelege situasjonar, seier Eva Lysen.

Barnevern har kanskje ikkje så godt rykte på seg, men ein møter mest positivt når jobbar innan dette området, meiner ho. Ein vert kjent med mange ungar og vaksne, og ikkje minst handlar barnevern mykje om å jobba førebyggjande, slær den nye barnevernskonsulenten fast.

Tidlegare har Eva Lysen jobba litt i barnehage.

- Eg er veldig glad i ungar, fortel ho, så det er nok mykje av grunnen til at ho valgte å utdanna seg innan barnevern.

No er ho altså her i Samnanger på tredje veka. At det vart akkurat Samnanger, har med reiseavstanden frå Kvam å gjera, forklarer ho.

Denne første tida på nytt kontor har gått med til å setja seg inn i ting og prøva å få oversikt over arbeidsoppgåvene. Elles høyrest Eva Lysen ut til å sjå fram til å ha arbeidsdagane sine i Samnanger.

- Det er veldig spennande og utfordrane å skulle jobba her, seier ho.

Ordførar Marit A. Aase var ein av ordførarane som møtte mellom andre statsminister Jens Stoltenberg på eit møte i Oslo måndag. Ordføraren seier til Samningen at ho oppfatta møtet som svært positivt.

På møtet fekk ordførarane presentert opplegget med at sjøkabel gjennom Hardanger skal utgreiast nærmare, og at ein difor vil starta utbygginga med den delen av traseen som etter Statnett og regjeringa sitt syn uansett skal gå i luft, nemleg over Kvamskogen. Ein vil rett og slett starta bygginga i Samnanger, i staden for i Sima som først tenkt.

På møtet vart det også lagt vekt på at ein heretter ville strekkja seg langt for å ha ein god dialog med kommunane, at kommunane skal ha ein reell medverknad og at det for eksempel kan vera snakk om justeringar på traseen.

Ordførar Marit A. Aase vil bruka invitasjonen om dialog til å fremja Samnanger sine småkraftsaker.

Sjølv om det ikkje nødvendigvis er nokon direkte samanheng, vil ordføraren kopla utbygginga i Samnanger opp mot problemet med vidare utbygging av småkraft i Samnanger.

Som kjent er det for tida sett stopp for nye småkraftprosjekt her i kommunen fordi det ikkje er linjekapasitet til å ta mot krafta. Når staten no vil byggja stor linje inn til Samnanger og byggja om trafostasjonen i Børdalen, samstundes som BKK Nett har planar som gjeld det lokale nettet, bør det også sytast for å gjera nødvendige tiltak slik at lokale småkraftutbyggjarar kan få setja i verk sine prosjekt og få krafta på nett, meiner ordføraren.

Ordførar Marit A. Aase vil også bruka dialogen til å jobba aktivt for å få gjort noko med vernevedtaket for sideelvane til Eikedalsvassdraget. At hovudvassdraget her er verna er det ingen usemje om, ingen vil byggja ut Fossen Bratte eller fossen i Mørkhølen for eksempel. Men også sideelevane er omfatta av vernevedtaket.

Ordføraren synest det er urimeleg at grunneigarane som vil byggja ut sideelvar til Eikedalsvassdraget, for eksempel i Børdalen og oppover ved Jarland, med dei minimale naturinngrepa det vil medføra, skal få nei, medan Statnett skal få lov å byggja ei stor og svært synleg linje over Kvamskogen og ned til Børdalen.

Elles er det ein del som spør seg om det kan verta snakk om ei vidare utbygging frå Børdalen til Bergen, at Sima – Samnanger berre er første steg på veg til Bergen.

Ordførar Marit A. Aase seier at dei har teke dette opp med både BKK og NVE fleire gonger, seinast på eit møte no i juli. Men dei har heile tida vorte forsikra om det ikkje er planar om noko ny linje frå Børdalen til Bergen. Krafta som kjem inn til Børdalen kan fordelast på fleire linjer, så ved å oppgradera eksisterande nett vil ein ha kapasitet til å ta krafta inn til Bergen.

Teknisk sjef Ivar Erstad seier det ser ut til at ein skal koma i mål med modulane som er sette opp ved skulen på Gjerde. Innvendig er alt klart, med pultar og det heile. No står det berre att litt arbeid utvendig.

Det som ikkje vil vera klart til skulestart, er den nye ballbingen og uteområdet attmed. Her skal ein bruka massar frå Anno-tunellen som vart sprengt denne veka. Ballbingen og området rundt vil ikkje vera ferdig før om ein månad.

Ivar Erstad innrømmer at det har vore ein svært hektisk periode for teknisk eining sine folk for å få alt klart, men legg fort til nokre ord om skulen sine folk, som har hatt det meir enn hektisk i det siste. Og det stemmer nok. Me i Samningen har ikkje ein gong vågt å ringja rektor Kjersti Mellingen Bruvik i det siste, ho jobbar visst dag og natt.

Som kjent var utgangspunktet at Kjersti Mellingen Bruvik og Marit Kulild skulle dela rektoransvaret på den nye Samnanger barneskule. Men no har Marit fått permisjon for å undervisa på lærarhøgskulen på Stord. Den nye situasjonen er løyst ved at Kjersti sin rektorstilling er auka frå 80% til 100%, Inge Aasgaard sin inspektørstilling er auka frå 30% til 50%, samt at Solveig Langeland skal ta ein del administrasjon som har med spesialundervisning å gjera.

Organiseringa av skuleskyssen har også vore eit problem. Karin Høysæter Steinsland har vore i tett dialog med busselskapet siste dagane og i føremiddag fall dei siste brikkene på plass slik at busstidene kan kunngjerast i papirutgåva av Samningen i morgon. Skuledagen ved Samnanger barneskule skal elles starta kl. 8.30 no, slik elevane ved tidlegare Nordbygda skule er van til, men altså ti minuttar tidlegare enn det var på Gjerde skule.

Den nye utfordringa når det gjeld skyss har vore dei nye ”skyss-elevane”, altså dei som bur mellom Ådland og Lauvskar. No vert det slik at alle ungdomsskuleelevar på denne strekninga skal ta bussen som kjem frå Rolvsvåg, slik dei alltid har gjort. Det nye vert at ungdomsskuleelevane som går på bussen på Reistad må bruka det vanlege busstoppet, Rolvsvågbussen vil ikkje kjøra innom på rundkjøringa, slik den gjorde før.

Barneskuleelevane på Ådland skal i utgangspunktet også ta Rolvsvågbussen, men her oppfordrar busselskapet elevane det høver for om å gå inn til Reistad. Borna som bur på ”rett side” av vegen vil då også sleppa å kryssa hovudvegen for å gå på bussen.

Dei som bur på strekninga Reistad – Lauvskar og som går på barneskulen på Gjerde vil få ein eigen buss. Bussen som kjem frå Tysse vil kjøra bortom til Reistad etter å ha sleppt av elevane som kjem frå Tysse og utover mot Fusa. Den bussen vil då koma inn på rundkjøringa på Reistad og ta med seg barneskuleelevane der. Den vil også ta med seg barneskuleelevar på Bjørkheim og Lauvskar. Barneskule-bussen vil i praksis koma litt seinare enn Rolvsvågbussen, men vil ikkje vera noko nødløysing for eventuelle ungdomsskule-sjusovarar, sidan bussen rett og slett ikkje går lengre enn til Lønnebakken.

Sjølvsagt er det ingen som veit nøyaktig korleis dette vil fungera i praksis. Karin Høysæter Steinsland ser då heller ikkje bort frå at det kan koma mindre justeringar seinare.

Tysdag vart tunellen på Gjerde sprengt vekk. I ei einaste diger salve vart både fjellet over tunellen og nasa utom sprengt. Eit stort publikum fekk sjå at Magne Trengereid og alle hans menn veit kva dei driv med.

Meir i papirutgåva.